Message of the Month

Mogall firgozkaramno,

Prachit Kall amkam Devache kurpecho kall.  Ho kall amkam amchea patkanchi dukh dhorun, jivit bodlun, Deva Bapaxim portun yeunk apoita. Ami sogllim osokt ani amche osoktayek lagun ami patkan poddtanv. Dev amche sovem mogall ani kaklutsar. Aplea osoktayent khala poddloleank ani Taka ulo martoleank To doyen ukhlun portun jivitachim panvlam marunk kurpa favo korta. Ami hachi bhorti  onnbhovunk Jezun Povitr Sobhent Sondhan Sonvskar vo Kumsaracho Sonvskar stthapla. Hea sonvskarant ami deivik mog ani kaklut bhorten onnbhovtanv. Povitr Sobha amkam xikoita: Vorsak ek pavtt tori kumsar zaunche (confess your sins at least once a month). Tori astanam jitle pavtti ami patok adhartanv ani tachi zannvikai amkam zata, title pavtti ho sonvskar somorombhun tantuntli favo zateli kurpa ami zoddunk vavrunk zai. Ho prachit kall amkam oslem mon apnnaun jivitachi khori novsornni korunk ek vhorto soeg!

Lukasan boroilolea Xubhvortomanant Jezu dha koddkarank boro korta hi ghoddni amkam mellta (Lk 17:  11-19).  Judevancho somoz aslo kodd/ pidda zaun asa patkacho porinnam. He dha koddkar aple jivitache poristhitint Jezu, Devacho Put mhonn ollkhun Tache kaklutik ulo martat. Jezu tankam tanchem ang Dev mondirant Iadnikak dakhoi mhonn sangta. Dha koddkara modlo  eklo apunn boro zala te ollkhun Jezuk dhinvasunk ieta,  hea koddkarak ek nomunno koso ghevun, ami-i oslea monan Kumsaracho sonvskar somorombhum-ia.

Poile suvater, hea sonvsakrachem mhotv ani goroz amchea jivitant ollkhum-ia.  Nhoi fokot vorsak ek pavtt vo tharailoleach disa ho sonvskar ghevunk ravum-ia. Deivik kaklut zoddunk ami-i amche proitn korum-ia.

Dusre suvater amchea ontoskornnachi bori chovkoxi korun khoim ami chukleanv ani patok adharlam hacho ugddas korun amchea patkanchi dukh dhorum-ia.  Teach borabor portun patok korina zaunk ami ek thir nichev korunk favo.

Kumsarachea Sonvskarant Dev Povitr Sobhechea munnyara udexim amchea patkanchem bhogsonnem favo korta.  Jedna iadnik bhogsonneachem magnnem (Prayer of Absolution) ucharta tedna tem aikun tea utrancho niyall korum-ia.

Xekim dukhichi ucharnni korun ani prachit dilam tem pallun hea sonvskarachi kurpa amkam favo zata. Ami-i amkam favo zal’lea pekovnnek portun Devaxim vochun taka dhinvasunk favo!

Tor hea xubh kallant amchi jivitachi novsornni korum-ia. Sondhan sonvskar vo kumsar somorombhun Paskanche porbek bhoktiponnim toyar zaum-ia.